Friday, August 24, 2012

വളര്‍ന്ന് വലുതായ കാഴ്ച്ചകള്‍


പുല്‍ച്ചാടി,
തൊട്ടാവാടി,
സോഡാക്കുപ്പിയുടെ മൂടി.
സ്ലേറ്റ്‌ പെന്‍സില്‍.,
രണ്ട് ചക്രങ്ങളുള്ള സൈക്കിള്‍.,
സിനിമാനടിയുടെ പൊക്കിള്‍.,
സ്വാതന്ത്ര്യം കൊതിക്കുന്ന മുലകള്‍,.
ബാര്‍ കൌണ്ടറിലെ തലകള്‍.,
നെടുവീര്‍പ്പിടുന്ന കെട്ടിടങ്ങള്‍,.
മൊബൈല്‍ ടവറുകള്‍.,
ആളില്ലാ യുദ്ധവിമാനങ്ങള്‍..

കൌതുകങ്ങളെയെല്ലാം പതുക്കെ മായ്ച്ച്
കാഴ്ച്ചയുടെ കുത്തനെയുള്ള കയറ്റം.
വളര്‍ന്ന് വലുതായ കാഴ്ച്ചകള്‍
കണ്ണുകള്‍ക്കുള്ളില്‍ ഒതുങ്ങാതാവുന്നു.
ഒരു വിലാപയാത്ര പോലെ
നിസ്സംഗരായി കടന്നു പോകുന്നു.
ചില രാത്രികളില്‍ ഉറക്കം കെടുത്തുന്നു.

ഇന്ന് കടല്‍തീരത്ത് പോയി മാനം നോക്കി കിടക്കണം.
എല്ലാറ്റിനും മുകളിലല്‍പ്പം കൌതുകം ബാക്കിയാക്കി
കുറച്ച് നക്ഷത്രങ്ങളുണ്ടാവുമവിടെ.
കണ്ണ് തുറന്ന് മലര്‍ന്ന് കിടക്കുമ്പോള്‍
നക്ഷത്രങ്ങള്‍ക്കിടയില്‍ നാല് കാലില്‍ നീന്തുന്നുണ്ടാവും
പുല്‍ച്ചാടികളെ തെരഞ്ഞ് പോയ ഒരു ചെറിയ കുട്ടി.
പൂരപ്പറമ്പില്‍ തനിച്ചാക്കപ്പെട്ടവനായി
ഒരു വിരല്‍ത്തുമ്പിന് വേണ്ടി ചുറ്റും പരതും
തെക്കും വടക്കുമറിയാത്ത ഒരു പത്ത് വയസ്സുകാരന്‍.

No comments:

Post a Comment